იაპონურ სტარტაპს, H2L Technologies-ს სურს, რომ მეტავერსში ტკივილი რეალურად შევიგრძნოთ. ამისათვის კომპანიამ სამაჯური შექმნა, რომელიც ტკივილის შეგრძნებას მცირე ელექტრული შოკებით მოგვანიჭებს.
როგორც Financial Times აღნიშნავს, ამ უცნაური ახალი გამოგონებით კომპანიას სურს, რომ სრულად გააქროს ის ზღვრები, რომლებიც ვირტუალურ და რეალურ სამყაროებს შორის არსებობს.
"ტკივილის შეგრძნება მოგვცემს საშუალებას ვაქციოთ მეტავერსი მეტად რეალისტურ გარემოდ, სადაც ჩვენი შეგრძნებები მაქსიმალურად იქნება რეალობასთან მიახლოვებული" — ყვება H2L-ის აღმასრულებელი დირექტორი, ემი ტამაკი Financial Times-თან საუბარში.
სტარტაპს ზურგს იაპონური ტექნოლოგიური გიგანტი, Sony უმაგრებს. კომპანიაში თვლიან, რომ ამ ტექნოლოგიით არამხოლოდ ტკივილი, არამედ ნებისმიერი სახის ფიზიკური დატვირთვა უნდა ვიგრძნოთ.
უკეთ რომ ავხსნათ, წარმოიდგინეთ თამაში, სადაც რაიმე მძიმე ნივთების გადაადგილება გვიწევს. თუ ჩვენ თამაშში გარკვეული სიმძიმის მქონე ნივთის აწევა მოგვიწევს, ეს ფიზიკურად უნდა ვიგრძნოთ, კუნთები უნდა დაიჭიმოს და გარკვეული დროის შემდეგ ისეთი შეგრძნება უნდა გაგვიჩნდეს, თითქოს დავიღალეთ.
სამაჯურს ელექტრული სიმულაციების წყალობით უამრავი შეგრძნების მიმიკრია შეეძლება.
ემი ტამაკი თვლის, რომ ეს ყველაფერი ჯერ მხოლოდ დასაწყისია. ემისა და მისი სტარტაპის მიზნები ბევრად უფრო დიდია ვიდრე უბრალო სამაჯურის შექმნაა. მას იმედი აქვს, რომ ამით ადამიანები შეძლებენ თავი დააღწიონ იმ შეზღუდულ გარემოს, რომელში არსებობაც უწევთ. ემის აზრით ვირტუალური რეალობა ხსნის ახალ შესაძლებლობებს ნებისმიერი ადმიანისთვის, რომელსაც მოგზაურობა და სამყაროს შემეცნება სურს და ამაში გარკვეული გარემოებები უშლის ხელს.
როგორც ემის მონათხრობიდან ვიგებთ, ტაქტილური სამაჯურის შექმნის იდეა მას შემდეგ გაუჩნდა, რაც კლინიკური სიკვდილი საკუთარ თავზე გამოსცადა. ამან მას გულზე გარკვეული პრობლემები დაუტოვა, შესაბამისად ემის ცხოვრება რადიკალურად შეიცვალა.
"ეს არის გზა, რომელიც გარკვეული დაავადებების მქონე ადამიანებს მისცემს საშუალებას შეერწყან გარე სამყაროს და იმოგზაურონ იქ სადაც უნდათ და როცა უნდათ" — ამბობს ემი.
