ახალი სამსახურის მოძებნა ან კარიერის შეცვლა მარტივი პროცესი არ არის. განსაკუთრებით, თუ ამას პირველად აკეთებთ, რადგან ამ დროს შეცდომებს ყველაზე ხშირად ვუშვებთ, რადგან:
1. გვავიწყდება პრიორიტეტები:
თუ თქვენს ცხოვრებაში, ფულის გამომუშავება ყველაზე მნიშვნელოვანი არ არის, მაშინ კარიერის არჩევამ მხოლოდ მაღალი ანაზღაურების გამო შეიძლება თქვენში უკმაყოფილების გრძნობა გააჩინოს. კვლევის მიხედვით, ფინანსური სტაბილურობისთვის საჭირო თანხაზე მეტის გამომუშავება ადამიანის კეთილდღეობაზე არ აისახება.
ამიტომაც, აარჩიეთ ისეთი კარიერა, რომელიც თქვენს ინტერესებს ყველაზე მეტად ერგება, მუშაობისას კი საათები წუთებად იქცევა.
2. ჩქარობთ კარიერის შეცვლას
არ იჩქაროთ კარიერის შეცვლა მხოლოდ იმიტომ, რომ ახლანდელი სამსახურიდან გინდათ წამოსვლა. უმჯობესი იქნება დაელოდოთ და მოძებნოთ ისეთი სამსახურები, რომლებიც თქვენთვის ყველაზე შესაფერისი იქნება. ნაჩქარევად მიღებული გადაწყვეტილებები ახალი კარიერის სწორად დაგეგმვაში შეგიშლით ხელს.
ამის ნაცვლად, უმჯობესი იქნება, რომ სამსახურის შემოთავაზების შემდეგ დაანებოთ ძველს საქმიანობას თავი. ასე ფინანსური გარანტიებიც გექნებათ და ახალი შესაძლებლობების ძებნის შფოთსაც აირიდებთ თავიდან.
3. კარიერას იცვლით სხვისი აზრის გამო
შეიძლება თქვენი მეუღლე ან მშობლები ფიქრობდნენ, რომ სხვა ინდუსტრია ან როლი უფრო არის თქვენთვის შესაფერისი. მაგრამ, კარიერის ცვლილების გადაწყვეტილება მხოლოდ თქვენ უნდა მიიღოთ. უნდა დაფიქრდეთ, თუ რა გინდათ, რა არის თქვენი მიზნები და რა გაბედნიერებთ. კარიერული ცვლილება მხოლოდ სხვისი სურვილის გამო შეიძლება ცუდი გადაწყვეტილება აღმოჩნდეს.
4. კარიერას იცვლით გეგმის გარეშე
ახალ ინდუსტრიაში გადასვლისას რთულია, რომ საოცნებო სამსახური პირველივე ცდაზე დაიწყოთ. ამისთვის მნიშვნელოვანია, რომ წინასწარ გაწეროთ თქვენი მიზნები და დაგეგმოთ შემდეგი ნაბიჯები. არ გამოგრჩეთ ის აქტივობები, რომლებიც თქვენი კვალიფიკაციისა და ცოდნის ასამაღლებლად იქნება საჭირო.
5. კარიერის ცვლილებისას არ აახლებთ თქვენს რეზიუმეს
თუ თქვენს რეზიუმეში მხოლოდ ძველი სამსახურებია მითითებული, გაგიჭირდებათ ახალი მიმართულებით მუშაობა. ამიტომაც, განაახლეთ თქვენი რეზიუმე, დაამატეთ თქვენი ისეთი უნარები, რომლებიც ახალ პროფესიაში დაგჭირდებათ. არ გამოგრჩეთ თქვენი გამოცდილება და განათლება.
იქიდან გამომდინარე, რომ ჯერ ახლა იწყებთ ახალ ინდუსტრიაში გადასვლას, შერეული რეზიუმეს შექმნა უკეთესი იქნება, ვიდრე ქრონოლოგიურის. კომპანიების ნაცვლად, ფოკუსირდით თქვენი უნარების წარმოჩენაზე.
6. არ უკავშირდებით ინდუსტრიის პროფესიონალებს
ახალი კარიერის დაწყებამდე უმნიშვნელოვანესია, რომ თქვენი საოცნებო სამსახურის წარმომადგენლები გაიცნოთ. კარგი კავშირები საუკეთესო საშუალებაა ახალ ინდუსტრიაში თავის დასამკვიდრებლად. ამიტომაც იარეთ შეხვედრებზე, გაიცანით ახალი ადამიანები და დაამყარეთ მათთან პროფესიონალური ურთიერთობები. ასევე გამოიყენეთ LinkedIn-ი ახალი კავშირების შესაძენად.
