სტარტაპმა Aquarian Space, სულ ახლახანს 650 000 დოლარი დაფინანსება მიიღო. მათი მიზანი უსადენო უსწრაფესი ინტერნეტის გავრცელებაა, თუმცა არა დედამიწაზე, არამედ მთვარესა და, შესაძლოა, მარსზეც.
კომპანიამ 17 მარტს გამოაცხადა, რომ მათ დაფინანსება Draper Associates-ისგან მიიღეს. სტარტაპს იმედი აქვს, რომ პირველ სისტემას მთვარეზე 2024 წლისთვის დადგამენ. ამის შესახებ ინფორმაციას Space ავრცელებს.
Aquarian Space-ის საიტზე ვკითხულობთ, რომ მაშინ, როდესაც ადამიანები მთვარის მისიებზე მილიარდობით დოლარს ხარჯავებ, არ არსებობს გზები, რომელთა მეშვეობითაც სამეცნიერო მისიების მიერ შეგროვებული ინფორმაცია დედამიწაზე უსწრაფესად დაბრუნდება.
"ლიმიტირებული შესაძლებლობების გამო კოსმოსური მისიებიდან შეგროვებული ინფორმაციის მიღებას ან ძალიან დიდი დრო ჭირდება, ან მათი გამოგზავნა უბრალოდ ნაწილ-ნაწილ ხდება."
Aquarian-ს ახალი სისტემის შექმნა სურს, რომელსაც Solnet ერქმევა და სატელიტების მეშვეობით მთვარეს 100 მეგაბიტი წამში სიჩქარის მქონდე ინტერენტით მოამარაგებს.
სტარტაპი პროექტის დეტალებისა და სპეციფიკაციების შესახებ ბევრს არაფერს გვიყვება, თუმცა ტექნიკურ მეთვალყურეობას მათ ამერიკელი პარტნიორები, მათ შორის NASA-ც უწევს. NASA-ს მსგავსი პროექტებისთვის საკუთარი პროგრამა აქვს — Commercial Lunar Payload Services (CLPS). პროგრამის ფარგლებში NASA ეხმარება კერძო სექტორს, რათა არტემისის მისიისთვის საჭირო ტექნიკის შექმნის პროცესში ისინიც ჩაერთონ.
"2021 წელს მთვარეზე და მთვარის გარშემო ჯამში 13 მოწყობილობა მუშაობდა, 2030 წლისთვის ეს რიცხვი 200-მდე უნდა გავზარდოთ და ჩვენ უნდა შევქმნათ მულტიმილიარდიანი მთვარის ეკონომიკა. ამ ყველაფრის განხორციელება კი შეუძლებელი იქნება, თუ ჩვენ არ გვექნება საკმარისად სწრაფი ინტერნეტი დედამიწასა და მთვარეს შორის" — ამბობს Aquarian Space-ის აღმასრულებელი დირექტორი, კელი ლარსონი თავის განცხადებაში.
