Starlink-ის სატელიტების შესახებ ალბათ უკვე გსმენიათ. ილონ მასკის ეს პროექტი დედამიწის მასშტაბით სატელიტური ინტერნეტის გავრცელებას ისახავს მიზნად.
მას შემდეგ, რაც 24 თებერვალს რუსეთი უკრაინაში შეიჭრა, მასკმა განვითარებული მსოფლიოს მხარე დაიჭირა და საღი აზრისკენ დადგა. მან Starlink-ის ინტერნეტის მისაღებად საჭირო ტექნიკა უკრაინაში უსწრაფესად გაგზავნა და ადგილობრივებმა სისტემაც მარტივად გამართეს.
იმისათვის, რომ Stralink-ის ინტერნეტთან დაკავშირება შევძლოთ, მათი აპლიკაციის გამოყენებაა საჭირო. აპლიკაციას ასევე Stralink ჰქვია და მისი გადმოწერა Play Store-დან ან App Store-დან არის შესაძლებელი.
Wall Street Journal-ის ინფორმაციით, SpaceX-ის სატელიტურ ინტერნეტთან დასაკავშირებელი აპლიკაცია უკრაინაში, ყველაზე გადმოწერად აპლიკაციებს შორის, ორშაბათს გამოჩნდა, კვირას კი ის უკვე პირველ ადგილს იკავებდა.
App Store-სა და Google Play-ზე დაკვირვებას Sensor Tower აწარმოებს. Wall Street Journal-თან საუბარში Sensor Tower აღნიშნავს, რომ მხოლოდ კვირას, App Store-დან და Play Store-დან აპლიკაცია ჯამში 21 000-ჯერ გადმოწერეს. ეს ერთ დღეში გადმოწერების მხრივ რეკორდული მაჩვენებელია.
Sensor Tower ასევე აღნიშნავს, რომ ორი კვირის განმავლობაში, უკრაინაში აპლიკაცია ჯამურად 100 000-ჯერ გადმოწერეს.
ილონ მასკის დახმარებითა და უსწრაფესი მუშაობით სტარლინკის ინტერნეტი უკრაინაში ხელმისაწვდომი ომის დაწყების პირველივე დღეებში გახდა. ილონ მასკს ამ თხოვნით პირადად უკრაინის ციფრული ტრანსფორმაციის მინისტრმა, მიხაილო დეფოროვმა მიმართა და როგორც უკვე ვთქვით, მასკის პასუხმაც არ დააყოვნა.
CNBC-ის ინფორმაციით, Starlink-ის მიმღები თეფშებისა და საჭირო აპარატურის ტრანსპორტირებაში დიდი როლი Tesla-მაც ითამაშა და მათი დახმარებით ტექნიკა უკრაინაში ორ დღეში ჩავიდა. იმისათვის რომ ინტერნეტს ომის პირობებში (დენის გარეშე) ემუშავა, მასკის კომპანიმ ისინი Tesla-ს ელემენტებითაც მოამარაგა.
მას შემდეგ, რაც რუსეთი უკრაინაში შეიჭრა, ქვეყნის მოსახლეეობის გარკვეულ ნაწილს ინტერნეტი აღარ მიეწოებოდა. გასულ კვირას ბრიტანეთის თავდაცვის სამინისტრომ გაავრცელა ინფორმაცია, რომ რუსეთი უკრაინის სატელეკომუნიკაციო ინფრასტრუქტურას მიზანმიმართულად ანადგურებდა. ინტერნეტის გარეშე დარჩა მარიუპოლი, სუმი, ხარკოვი და უკრაინის დედაქალაქი კიევი. თუმცა, როგორც ხედავთ, ილონ მასკისა და მისი ორი კომპანიის დახმარებით, ეს პრობლემა მეტნაკლებად გადაიჭრა.
