Tesla-ს აღმასრულებელი დირექტორის, ილონ მასკის თქმით, აგვისტოში დაგეგმილი "Ai Day" სექტემბრისთვის გადაიდება, რადგან კომპანიას სურს, რომ მათი რობოტის, Optimus-ის პირველი მუშა პროტოტიპი გვიჩვენონ.
Optimus სწორედ ის ჰუმანოიდი რობოტია რომლის შესახებაც მასკმა საუბარი დიდი ხნის წინ დაიწყო. ეს იქნება რობოტი, რომელიც განმეორებითი, დამღლელი სამუშაოების შესრულებას შეძლებს და ადამიანებს შრომას შეუმსუბუქებს. ახალი რობოტი მასკმა პირველად 2021 წლის აგვისტოში გამართულ AI Day-ზე წარადგინა. მაშინ რობოტი მუშა მდგომარეობაში არ იყო და მხოლოდ მისი ვიზუალური მხარე ვიხილეთ. როგორც ჩანს, მასკს რობოტის მუშა ვერსიის ხილვა ძალიან სურდა და მისი შექმნის პროცესი ტესლამ მნიშვნელოვნად დააჩქარა, თუმცა ამ წლის აგვისტომდე მოსწრება მაინც ვერ მოხერხდა.
უნდა ითქვას, რომ Tesla-ს აქამდეც ბევრი გიჟური იდეა ჰქონია და მათგან საკმაოდ დიდ რიცხვს დღის სინათლე არც უნახავს. მაგალითად Tesla-ს 2013 წელს ჰქონდა იდეა შეექმნა გამოცვლადი ელემენტები, რომლებიც მეტი მანძილის გავლის საშუალებას მოგვცემდა. ასევე მასკს სურდა მზის სუპერდამტენების ქსელის შექმნა, რაც ასევე არ გამოვიდა. ჯერ კიდევ უცნობია როდის შეძლებენ მომხმარებლები ჰიპერლუპით მგზავრობას. შეიძლება ითქვას, რომ მასკს ეს ამბიციური გეგმაც მეტნაკლებად ჩაუვარდა.
მასკს მსოფლიოს ყურადღების მიპყრობა ძალიან კარგად გამოდსის და ამაში ბადალი ნამდვილად არ ჰყავს, თუმცა რეალობისთვის უნდა ითქვას, რომ ჰუმანოიდი რობოტის შექმნასთან ჯერ არცერთი კომპანია ახლოსაც კი არ არის და ეს ეხება Boston Dynamics-საც. ამ უკანასკნელს რობოტიკაში უდიდესი გამოცდილება აქვს, შეილება ითქვას, რომ ისინი ამ ინდუსტრიის ლიდერები არიან, მაგრამ მათი ბიპედალური რობოტებიც ამჟამად ექსპერიმენტალურ მდგომარეობაში იმყოფებიან. მათ მიერ შექმნილ რობოტ Atlas-ს დღემდე უჭირს გამართულად სიარული და წონასწორობის შენარჩუნება, რაც ხშირად მისი დაცემით სრულდება. ამ ყველაფრის გათვალისწინებით ძალიან საინტერესოა რას შემოგვთავაზებს ილონ მასკი სექტემბერში.
