ბორბალი - მსოფლიოს პირველი ყველაზე მნიშვნელოვანი გამოგონება ძვ.წ. მეოთხე ათასწლეულში შუმერებს ეკუთვით. მას შემდეგ სამყაროს განვითარების ტემპი აჩქარდა. ჯერ მიწის დასამუშავებელი მოწყობილობები შეიქმნა, შემდეგ კი პირამიდების აშენება გახდა შესაძლებელი. დღეს კი მეზობელ პლანეტაზე - მარსზე გასაფრენად ახალი პროგრამა იქმნება.
მოდით, გავიხსენოთ 10 ტექნოლოგიური გამოგონება, რომელმაც მსოფლიო შეცვალა.
1. Apple iPhone
მიუხედავად იმისა, რომ iPhone-ი პირველი სმარტფონი არ არის, მან სრული გადატრიალება მოახდინა ტექნოლოგიურ სამყაროში. Apple-იმ 2007 წელს შეძლო და კომპიუტერის შესაძლებლობების დიდი ნაწილი ერთ პატარა ტელეფონში მოაქცია.
ახალმა გამოგონებამ ადამიანებს სამყაროს შეცნობის მეტი საშუალება მისცა: კამერა, რომლითაც წამებში შეგიძლია გარემოს აღბეჭდვა, GPS შენს ხელში, პერსონალური ციფრული ასისტენტი და MP3, რომლის საშუალებითაც მუსიკას სასურველ ადგილას და დროს მოუსმენ.
პირველი iPhone-ის გამოსვლიდან თითქმის 15 წელი გავიდა. დღეს კი ახალი მოდელების შესაძლებლობები სულ უფრო და უფრო იზრდება.
2. Wi-Fi
სმარტფონები და ინტერნეტი, რომლებსაც დღეს ვიყენებთ, ასეთი სახით ვერ იარსებებდა Wi-Fi-ის გარეშე. 1995 წელს ინტერნეტში შესასვლელად ქსელთან დაკავშირებული კაბელის გამოყენება იყო საჭირო. 1997 წელს კი Wi-Fi გამოიგონეს, რომლის საშუალებითაც ინტენერტ ქსელს უსადენოდ შეგვიძლია დავუკავშირდეთ. დღეს უსადენო როუტერების დამსახურებით, ინტერნეტს ვუკავშირდებით სახლიდან, ოფისიდან, ავტობუსიდან და კოსმოსიდანაც კი.
Wi-Fi აუცილებელია ჩვენი ყოველდღიური პერსონალური თუ პროფესიული ცხოვრებისთვის. დღეს უკვე იშვიათად შეხვდებით ისეთ ადგილს, სადაც Wi-Fi არ არის.
3. ნივთების ინტერნეტი (IoT)
Wi-Fi-იმ ადამიანებს მხოლოდ E-mail-ების შემოწმებისა და გართობის საშუალება არ მისცა. მისი დამსახურებით, მილიონობით სამომხმარებლო მოწყობილობა უკავშირდება ერთმანეთს და ცვლის ინფორმაციას (ადამიანის ჩარევის გარეშე). სწორედ ასე იქმნება სისტემა, რომელსაც „ნივთების ინტერნეტი“ ეწოდება. ეს ტერმინი 1999 წელს გამოიყენეს პირველად, თუმცა იდეა მხოლოდ ბოლო ათწლეულში გახდა პოპულარული.
დღეს, დედამიწაზე მილიარდობით ინტერნეტთან დაკავშირებული მოწყობილობაა, რომლებიც სხვადასხვა საქმის შესრულებაში გვეხმარება: სახლის სმარტ მოწყობილობები ყოველდღიურ ცხოვრებას გვიმარტივებენ. ახლა ერთი ადგილიდან არის შესაძლებელი სინათლის ანთება, შემოსასვლელთან დამონტაჟებული კამერის შემოწმება ან იმის შეხსენება, რომ საყიდლებზე ვართ წასასვლელი.
4. Bluetooth
Bluetooth - კიდევ ერთი უსადენო ტექნოლოგიაა, რომელიც თანამედროვე ყოველდღიური ცხოვრებისთვის აუცილებელია. ის 1999 წელს შექმნეს, მთავარი მიზანი კი ტელეფონისა და უსადენო მიკროფონიანი ყურსასმენების დაკავშირება იყო. მისი დამსახურებით შეგეძლო ტელეფონზე გესაუბრა და თან სხვა საქმე გეკეთებინა.
თუმცა, მას შემდეგ მისი ფუნქციები გაიზარდა, ახლა კი მრავალ ტექნოლოგიასთან უსადენოდ დაკავშირების საშუალებას იძლევა. 2012 წლიდან 2018 წლამდე Bluetooth-იანი მოწყობილობების რიცხვმა 10 მილიარდს გადააჭარბა.
5. VPN
VPN - იგივე ვირტუალური კერძო ქსელი, კომპიუტერსა და ინტერნეტს შორის ინფორმაციის უსაფრთხოდ გადაცემაში გვეხმარება. ის 1996 წელს შეიქმნა და მას ძირითადად დიდი ბიზნესები იყენებდნენ, რათა დისტანციურად მომუშავე თანამშრომლებს კომპანიის მონაცემებზე უსაფრთხო წვდომა ჰქონოდათ.
მას შემდეგ მის მოხმარებელთა სია გაიზარდა. VPN-ის საშუალებით ჩვენ შეგვიძლია IP მისამართების, ჩვენი ონლაინ აქტივობის და მსგავსი მოქმედებების დამალვა. რაც უფრო იზრდება ინტერნეტის მომხმარებელთა და შესაძლებლობების რიცხვი, მით უფრო საჭიროა მონაცემების უსაფრთხოებაზე ზრუნვა. VPN კი ამის ერთ-ერთი საუკეთესო და მარტივი საშუალებაა.
6. Blockchain
Blockchain - ბლოკების ჯაჭვი, არის მზარდი ჩანაწერების - „ბლოკების“ სია, რომელიც კრიპტოგრაფულად არის დაცული. ამის დამსახურებით, მასში მონაცემების შეცვლა თითქმის შეუძლებელია. სწორედ ამიტომ არის, რომ ამ ტექნოლოგიას თანამედროვე სამყარო სხვადასხვა მონაცემების შესანახად თუ ტრანზაქციებისას იყენებს - ხმის მიცემის სისტემები, ლატარეები, ID ბარათები და სხვა მსგავსი სისტემები სწორედ Blockchain ტექნოლოგიაზე არის დაფუძნებული.
7. ხელოვნური ინტელექტი (AI)
AI - ხელოვნური ინტელექტი დიდი ხნის განმავლობაში მხოლოდ სამეცნიერო ფანტასტიკის ნაწილად მიიჩნეოდა. თუმცა, ბოლო ათწლეულებში ის ჩვენს სამყაროშიც შემოიჭრა და ერთ-ერთ ყველაზე მნიშნელოვან ტექნოლოგიად იქცა. სწორედ მასზეა დაფუძნებული სახის ამომცნობი სისტემები, თუმცა მისი ფუნქციები ამით არ შემოიფარგლება. ხელოვნური ინტელექტი წარმატებით გამოიყენება სამედიცინო სამყაროში, ტრანსპორტირებისას, ვაჭრობისას და სხვა. ინტერნეტში კი გამოიყენება ყველაფერში - ხმის ამომცნობის სისტემიდან დაწყებული, Spam შეტყობინებების გაფილტვრით დამთავრებული.
თუმცა, ხელოვნური ინტელექტის შესაძლებლობები ამ ყველაფერზე დიდია. იქიდან გამომდინარე, რომ მისი მთავარი არსი - ადამიანის ინტელექტის დონის მიღწევაა, მისგან სხვა უამრავ შესაძლებლობას უნდა ველოდოთ.
8. კვანტური კომპიუტერი
დღეს კომპანიები და ქვეყნები კვანტური კომპიუტერების შესაქმნელად მილიარდობთ დოლარს ხარჯავენ. მიუხედავად იმისა, რომ ის ჯერ კიდევ შექმნის პროცესშია, მასზე ძალიან დიდი იმედების დამყარება შეგვიძლია. კვანტურ კომპიუტერს ექნება შესაძლებლობა, რომ მოუხერხებელი პრობლემები გადაჭრას თითქმის ყველა დარგში: ქიმია, ფიზიკა, ვაჭრობა, მატერიებს დიზაინი, ფინანსები, ხელოვნური ინტელექტი და სხვა.
ახალმა ტექნოლოგიამ უკვე რამდენჯერმე შეძლო თავისი შესაძლებლობების დამტკიცება. Google-მა უკვე გამოსცადა კვანტური პროცესორი „Sycamore“, რომელმაც დავალების შესრულება 200 წამში შეძლო. Google-ის მონაცემების მიხედვით, კი ანალოგიური დავალებს შესრულებას მსოფლიოში ყველაზე სწრაფი სუპერკომპიუტერი 10 000 წელი მოუნდებოდა.
9. 3D პრინტერი
3D პრინტერები - იმ ტექნოლოგიებს მიეკუთვნება, რომლებიც ყოველწლიურად უფრო და უფრო ხელმისაწვდომი ხდება. მათი დამსახურებით ყველაფრის შექმნა არის შესაძლებელი.
მისი გამოყენება უკვე დაიწყეს დიდმა კომპანიებმა. Adidas-მა უკვე შექმნა 3D პრინტერით დამზარებული ფეხსაცმელის ახალი კოლექცია. Porsche კი გეგმავს, რომ მოხმარებლებს ახალი მანქანების სავარძლები სწორედ 3D პრინტერის საშუალებით დაუმზადოს.
თუმცა, მისი შესაძლებლობები აქ არ მთავრდება. მას ძალიან დიდი მომავალი აქვს მედიცინის განვითარებაში. მეცნიერები უკვე მუშაობენ 3D პრინტერით კანის, კუნთებისა და სხეულის სხვა ნაწილების ანალოგების შექმნაზე - რომელსაც უამრავი ადამიანის სიცოცხლის გადარჩენა შეეძლება.
10. ვირტუალური რეალობა (VR)
VR - კომპიუტერულად შექმნილი რეალობა უკვე დიდი ხანია ჩვენს გარშემოა. ვიდეო-თამაშების კომპანიები, სამხედრო-საწვრთნელი ბაზები, მედიცინა - უკვე დიდი ხანია მას იყენებს.
მაგრამ, მისი შესაძლებლობები კიდევ უფრო ფართოვდება. მეტავერსის პოპულარობის ზრდასთან ერთად, მალე უნდა ველოდოთ ახალ ვირტუალურ რეალობას, რომელშიც ცხოვრება იქნება შესაძლებელი.
დაეუფლე აქტუალურ პროფესიებს - მოგვიერთდით სტეპერების დიდ ოჯახში!
IT Academy Step ლიდერი IT სფეროში , ახლა უკვე 100+ ფილიალით!
+995 577 538 549 ქ.თელავი, ნადიკვრის #23
+995 (32) 215-55-51 ქ.თბილისი, ა.ყაზბეგის 34/34 ბ
https://www.facebook.com/itstep.ge
