ასეთ რამეს მხოლოდ Amazon თუ მოიფიქრებდა.
ტექნოლოგიურ გიგანტს სურს, რომ მისმა ხმოვანმა ასისტენტმა, Alexa-მ ჩვენი ახლობლების, უფრო სწორად კი დაღუპული ახლობლების ხმით საუბარი შეძლოს. ეს ალბათ ყველას Black Mirror-ის სერიებს გაგახსენებთ.
Amazon-ის ყოველწლიური კონფერენციის, re:Mars-ის მიმდინარეობისას, ამაზონის ვიცე პრეზიდენტმა და Alexa-ს განვითარების მთავარმა მეცნიერმა, როჰიტ პრასადმა საზოგადოებას ახალი ფუნქციის დემო ვერსია წარუდგინა. პრეზენტაციისას ამაზონმა გვანახა თუ როგორ უკითხავს Alexa ბავშვს ზღაპარს ბებიის ხმით — ამის შესახებ ინფორმაცია პირველად TechCrunch-მა გაავრცელა.
"ამ ფუნქციის შესაქმნელად ჩვენ დიდი ძალისხმევა გავიღეთ. საჭირო გახდა შეგვექმნა ალგორითმი, რომელიც შეძლებდა ხმის მიმიკრიას რამდენიმეწუთიანი ჩანაწერითაც კი, ასეთი რამისთვის კი აქამდე მრავალსაათიანი სტუდიური ჩანაწერები იყო საჭირო. ჩვენ ამ პრობლემის გადასაჭრელად ხმის გარდაქმნის მეთოდი გამოვიყენეთ" — განაცხადა როჰიტ პრასადმა კონფერენციაზე.
მიუხედავად ასეთი ტექნოლოგიის მორალური მხარისა, პრასადის თქმით ეს არის ერთ-ერთი საუკეთესო დემონსტრაცია იმისა, თუ რა შეუძლია ხელოვნურ ინტელექტზე დაფუძნებულ ტექნოლოგიებს.
პრასადის თქმით, მარადიული ძილიდან გამოღვიძებული ციფრული ბებია დიდი გამარჯვებაა, მას ისიც აღნიშნა, რომ ჩვენ ხელოვნური ინტელექტის ოქროს ხანაში ვცხოვრობთ და ის, რაც ერთ დროს სამეცნიერო ფანტასტიკა იყო, დღეს რეალობა ხდება.
Gizmodo აღნიშნავს, რომ ამაზონის Alexa-ს ახალი ფუნქციონალი პირველი არ არის და იაპონურმა სტარტპმა, Takara Tomy-მ მსგავსი რამ უკვე შექმნა. იაპონელების მოწყობილობა ბავშვებს ზღაპრებს მშობლების ხმით უკითხავს.