მიიჩნევა, რომ სიცოცხლის განმავლობაში, ადამიანს პროფესიის შეცვლის სურვილი 5-ჯერ მაინც უჩნდება. Bureau of Labor Statistic-ის მიხედვით, 50 წელს მიღწეული ადამიანების უმრავლესობას სამსახური 10-ჯერ მაინც აქვთ გამოცვლილი. იმის მიუხედავად, რომ კარიერის შეცვლის გადაწყვეტილების მიღება ძალიან რთულია, ის ყველას ცხოვრების განუყოფელი ნაწილია.
კარიერის ცვლილებას ცხოვრების შეცვლა შეუძლია. შეიძლება ახლანდელ სამსახურში ვეღარ ვითარდებოდეთ, ან ახალი გამოწვევები გინდოდეთ - ახალ კარიერას მრავალი საინტერესო შესაძლებლობის მოტანა შეუძლია.
21-ე საუკუნეში შრომითი ბაზარი სწრაფად იცვლება. ახლა დასაქმების შესაძლებლობები უფრო მოქნილია, ხშირია დისტანციური და ნახევარ-განაკვეთიანი სამსახურის შემოთავაზებები. ამასთან ერთად, თანამედროვე სამყარო იძლევა საშუალებას, რომ მუშაობასთან ერთად, ყოველდღიურად განვითარდეთ - ონლაინ კურსები, ტრენინგები და მასტერკლასები მარტივად ხელმისაწვდომია.
რატომ უნდა შეიცვალოთ პროფესია?
ამის მრავალი მიზეზი არსებობს და ისინი ყველასთვის განსხვავებულია. შეიძლება თქვენ ახალ გამოწვევებს ეძებთ, მოგბეზრდათ ძველი რუტინა და კომფორტის ზონიდან გსურთ გამოსვლა. ან, შეიძლება თქვენი ღირებულებები და პრიორიტეტები შეიცვალა და გსურთ, რომ სახლიდან იმუშაოთ, რათა ოჯახს უფრო მეტი დრო დაუთმოთ. ამასთან ერთად, ადამიანი მუდმივად ვითარდება და იცვლება მისი მიზნები და ოცნებები. იქნებ ახლა აღმოაჩინეთ, რომ უფრო კრეატიული საქმიანობით გინდათ რომ დაკავდეთ? და, ყველაზე მარტივი მიზეზი, რატომ შეიძლება გინდოდეთ კარიერის შეცვლა - თქვენ არ ხართ ბედნიერი ახლანდელ სამსახურში.
გეცნოთ თქვენი თავი? კარიერის შეცვლა რთული გადაწყვეტილებაა და მას სწორი მიდგომა სჭირდება. სტეპის ბლოგში გაგაცნობთ იმ პრაქტიკულ რჩევებს, რომლებიც ახალი კარიერის დაწყებაში დაგეხმარებათ:
- დაუკავშირდით თქვენთვის საინტერესო პროფესიის მქონე ადამიანებს:
კარიერის ცვლილების საწყის ეტაპზე ნეთვორქინგი უმნიშვნელოვანესია. განსაკუთრებით იმ ადამიანებთან, რომლებიც თქვენთვის საინტერესო პროფესიით მუშაობენ.
ასეთ ადამიანებთან კონტაქტით შთაბეჭდილება შეგექმნებათ, თუ რეალურად
როგორია ის კარიერა, რომელიც გაინტერესებთ და რამდენად ახლოსაა თქვენს მიზნებთან. ამასთან ერთად, კარგი კავშირები დაგეხმარებათ პროფესიონალური კონტაქტების მოპოვებაში.
თანამედროვე სამყარო გვაძლევს საშუალებას, რომ ადამიანებს დავუკავშირდეთ როგორც ციფრულ, ასევე რეალურ სამყაროში. პროფესიული კავშირების მოსაპოვებლად, LinkedIn-ი ყველაზე კარგი პლატფორმაა, რადგან ის სფეროს სპეციალისტების დიდ რაოდენობას აერთიანებს. ამიტომაც, განაახლეთ თქვენი LinkedIn პროფილი და დაუკავშირდით იმ ადამიანებს, რომლებსაც თქვენი სასურველი პროფესია აქვთ.
ასევე, აუცილებლად დაესწარით შეხვედრებსა და მასტერკლასებს თქვენთვის საინტერესო მიმართულებით. ასე სფეროს პროფესიონალებს უფრო კარგად გაიცნობთ, შეძლებთ, რომ კითხვები პირადად დაუსვათ და გაიგოთ, თუ რა უნარები და ცოდნაა საჭირო ახალი კარიერის დასაწყებად. ამასთან ერთად, კარგი ნეთვორქინგის შედეგად, შეგიძლიათ კითხოთ თავისუფალი სამუშაო ადგილები ხომ არ აქვთ. ამ ადამიანებთან ურთიერთობა მიგახვედრებთ, თუ როგორ გახადოთ თქვენი კანდიდატურა უფრო მიმზიდველი.
2. განაახლეთ თქვენი რეზიუმე:
ახალი კარიერის დაწყებისას აუცილებელია, რომ რეზიუმე სრულიად განაახლოთ, რათა ის ახალ ინდუსტრიას მოარგოთ.
ახალ რეზიუმეში აუცილებლად წარმოაჩინეთ თქვენი ის გადაცემადი (transferable) და მოქნილი (soft) უნარები, რომლებსაც უკვე ფლობთ და პროფესიულ ცხოვრებაში იყენებთ. ამასთან ერთად, აჩვენეთ ახალ დამსაქმებელს თუ რას მიაღწიეთ ძველ სამსახურში. რიცხვები და სტატისტიკები თქვენს რეზიუმეს ბევრად საინტერესოს გახდის. მომავალ დამსაქმებელს უნდა იცოდეს, რომ თქვენ დასახული მიზნის მიღწევა შეგიძლიათ და მოტივირებული და პროდუქტიული თანამშრომელი იქნებით.
3. დატესტეთ ახალი კარიერა:
სანამ სრულ განაკვეთზე დაიწყებთ მუშაობას, გამოიყენეთ მოხალისეობრივი და ნახევარ-განაკვეთიანი სტაჟირების შესაძლებლობები. ასე მნიშვნელოვან გამოცდილებას მიიღებთ კარიერის მიმართულებით და დარწმუნდებით - გინდათ თუ არა ახალ მიმართულებაზე გადასვლა.
თუ უკვე გქონდათ ინტერვიუ იმ ადამიანთან, რომელსაც თქვენთვის საინტერესო პროფესია აქვს, კითხეთ მათთან პრაქტიკის გავლა ხომ არ შეიძლება. ან გამოიყენეთ ფრილანსერული შესაძლებლობები, რომ ახალი პროექტები თქვენს დღის განრიგს მოერგოს.
ასევე, შეამოწმეთ განცხადებები და ადგილობრივი კომპანიები, რადგან არასდროს იცით, რა შესაძლებლობას შეიძლება მიაგნოთ.
4. დაიწყეთ სწავლა
თუ სრულიად განსხვავებულ ინდუსტრიაში გსურთ გადასვლა, მხოლოდ მოხალისეობა და სტაჟირება არ იქნება საკმარისი ახალი პოზიციისთვის. ისეთი მიმართულებები, როგორებიცაა IT ან ჯანდაცვა სპეციფიკურ ცოდნას მოითხოვენ.
პირველ რიგში, მნიშვნელოვანია, რომ მოიძიოთ რა განათლება და უნარები სჭირდება თქვენთვის სასურველ ახალ კარიერას. მრავალი ონლაინ პროგრამის გავლა ასინქრონულად შეგიძლიათ, ისინი მარტივად მოერგება თქვენს სამუშაო გრაფიკს. მაგრამ, სასწავლო პროგრამები, რომლებსაც ფიზიკურ სივრცეში დასწრება სჭირდება, ნაკლებად მოქნილია და მოგიწევთ, რომ მათთვის თქვენი გრაფიკიდან დრო გამოყოთ.
ონლაინ კურსების მოსაძიებლად შეგიძლიათ გამოიყენოთ MOOC-ი ან OpenCourseWare და მიიღოთ ფუნდამენტური ცოდნა თქვენთვის საინტერესო მიმართულებაზე.
5. დაისახეთ SMART მიზნები
SMART მიზნები არის:
- კონკრეტული (specific)
- გაზომვადი (measurable)
- მიღწევადი (achievable)
- რეალისტური (realistic)
- დროში გაწერილი (time-bound)
ამ ტიპის მიზნების ყოველთვის აქვს შედეგი, რადგან ისინი მოითხოვენ ზუსტად გაწერილ სამოქმედო გეგმას და მოქმედებებს.
ამიტომაც, როდესაც კარიერის ცვლილებას გადაწყვეტთ, მიზანი აუცილებლად გახადეთ კონკრეტული. ზუსტად განსაზღვრეთ, თუ რომელი პროგრამების გავლა მოგიწევთ, რა ღონისძიებებს უნდა დაესწროთ ან რამდენი თვე დასჭირდება სწავლის პროცესს. კარგად შეისწავლეთ თქვენი სამუშაო გრაფიკი და დარწმუნდით, რომ თქვენი მიზნები რეალისტური და მიღწევადია.
ასევე, კარგი იქნება, თუ თქვენს მიზანს პატარა სექციებად დაყოფთ. მაგალითად, პირველი ნაბიჯი საჭირო განათლების მიღება იქნება, ხოლო ამის შემდეგ დაიწყებთ საჭირო კავშირების მოგროვებას.
თითოეული სექცია შეადგინეთ SMART-ის მიხედვით და თვალი ადევნეთ თქვენს პროგრესს. ეს დრო ყველასთვის განსხვავებული იქნება. შეიძლება კონკრეტული მიზნის მისაღწევად დაგჭირდეთ 3, 6 ან 12 თვე.
6. არ დაივიწყოთ თქვენი მიზანი:
არ დაგავიწყდეთ, თუ რატომ გადაწყვიტეთ კარიერის შეცვლა (შეიძლება გსურთ, რომ უფრო ბედნიერი იყოთ ან უფრო მნიშვნელოვანი საქმე აკეთოთ). იმის მიუხედავად, თუ რა დრო დასჭირდება მას ან რამდენ წინააღმდეგობას წააწყდებით, ხშირად შეახსენეთ თავს თქვენი მიზნები - რა გაბედნიერებთ, როგორ გინდათ, რომ თქვენი ცხოვრება გამოიყურებოდეს, რა არის თქვენთვის ყველაზე მნიშვნელოვანი და რამდენი ფული გჭირდებათ იმისთვის, რომ თქვენი საჭიროებები დაკმაყოფილდეს და სხვა.
