Microsoft Azure Quantum-ის კვანტური პროგრამის ფარგლებში მეცნიერებმა შეძლეს და შექმნეს არაერთი მოწყობილობა, რომლებიც საჭირო კვანტურ თვისებებს ავლენენ და ინარჩუნებენ. ამის შესახებ Microsoft თავის ბლოგში გვიყვება.
Microsoft-ის თქმით, ეს არის გარღვევა, რომელსაც შეუძლია მიგვიყვანოს კვანტური გამოთვლების ახალ ერამდე. ამ ყველაფერს კი სინქრონულად მომუშავე მილიონობით ქუბიტი უზრუნველყოფს.
"გასაოცარია, რომ ადამიანებმა შეძლეს და შექმნეს ისეთი სისტემა, რომელსაც ფიზიკის ერთ-ერთი ყველაზე ეგზოტიკური გამოვლინების დემონსტრაცია შეუძლია. ჩვენ იმედი გვაქვს, რომ აქედან სარგებელს მივიღებთ. ნამდვილი კვანტური მოწყობილობით ჩვენ გამოთვლების საერთოდ ახალ სამყაროში გადავაბიჯებთ, რაც კიდევ უფრო მეტად დაგვეხმარება გავიგოთ, თუ როგორ მუშაობს ბუნება" — ამბობს Krysta Svore, Microsoft-ის კვანტური სოფთვეარ პროგრამის წამყვანი ინჟინერი.
რას მიაღწიეს მკვლევარებმა? მათ შექმნეს აპარატურა რომლითაც შესაძლებელია წყვილი მაიორანული ნულოვანი "მოდი-თ" გაერთიანებული, მატერიის (ნივთიერების) ტოპოლოგიური ფაზის ინდუცირება. მაიორანული ნულოვანი "მოდი" ესაა კვანტური "აღგზნების" გარკვეული ტიპი, რომლის თეორიული საფუძვლები პირველად შეიმუშავა იტალიელმა ფიზიკოსმა ეტტორე მაიორანამ.
მაიორანული ნულოვანი მოდი კვანტური ინფორმაციის შენახვისთვის აუცილებელი კომპონენტია. ამით მეცნიეებმა ქუბიტის უნიკალური ტიპის, ტოპოლოგიური ქუბიტის შექმნა შეძლეს. სწორედ მათ გამოიყენებს მაიქროსოფტის კვანტური კომპიუტერები.
კვანტური კომპიუტერი, რომელიც ასეთ ქუბიტებზე იმუშავებს, სხვა მოწყობილობებთან შედარებით ბევრად სტაბილური იქნება, ამით კი ის პრობლემა გადაიჭრება, რაც ამჟამად კვანტური კომპიუტერების უმეტესობას აწუხებს.
