გამორჩეული სიძლიერისა და შეუპოვრობის ადამიანი, რომელიც საკუთარ ცხოვრებას ბრძოლად აღიქვამდა - "დიახ ბატონებო მე დავიბადე მუდმივი ბრძოლისთვის! ბრძოლისთვის მეპოვა სიმშვიდე ამქვეყნიურ ქაოსში. ბრძოლისთვის საკუთარ თავთან, სინამდვილესთან, სურვილთან" - წერს გიგა ერთ-ერთ თავის ბლოგში. მას სჯეროდა, რომ თითოეულ ადამიანს აქვს ძალა, თუ არ დანებდება და მიზნისკენ მუდმივად იმოძრავებს, შეცვალოს რეალობა.
გიგა დაიბადა 90-იან წლებში, ქვეყანაში, სადაც ყოველდღიური ყოფა უზომო სირთულეებით იყო სავსე. მისი ცხოვრებისეული გამოწვევები მხოლოდ ამ რთულმა პერიოდმა არ განსაზღვრა – მას დაუდგინდა სპინალურ-კუნთოვანი ატროფიის მძიმე დიაგნოზი, რომელსაც ბევრი დანებდებოდა. მაგრამ გიგა არავის ჰგავდა – მან ეს გამოწვევა საკუთარ სიძლიერედ გადააქცია.
გიგას დედა, ქეთევან ჯინჭარაძე, არის მთავარი ძალა, რომელმაც ბავშვობაში მას ბრძოლისთვის საჭირო მთავარი ინსტრუმენტი - რწმენა გაუღვივა. მან შვილებს ბავშვობიდანვე ჩაუნერგა შრომისმოყვარეობისა და პასუხისმგებლობის გრძნობა. მიუხედავად იმისა, რომ არაადაპტირებული გარემოს გამო გიგა და მისი უმცროსი ძმა სკოლაში ვერ დადიოდნენ, მათ განათლების მიღება არ შეუწყვეტიათ და სახლში განაგრძეს სწავლა.
გიგას ცხოვრებაში გარდამტეხი მომენტი 16 წლის ასაკში დადგა, როდესაც პირველად ჩაერთო IT სფეროში. ეს მისთვის კარი გახდა წარმატებისკენ, რაც არა მხოლოდ მის პირად განვითარებას, არამედ სხვებისთვისაც გზის გაკვალვას გულისხმობდა.
სტეპის გუნდს, გიგა 2017 წელს შემოუერთდა და 7 წლის განმავლობაში ქმნიდა პროფესიული განვითარებით დაინტერესებული, ყველა ადამიანისთვის საინტერესო, შთამაგონებელ და სასარგებლო ბლოგებს.
გიგა არის მაგალითი იმის, თუ როგორ შეიძლება იყო ყოველთვის პროდუქტიული და ეფექტური. ის ყოველდღიურად 12 საათზე მეტს მუშაობდა. მისი შრომისმოყვარეობა და მიზანსწრაფულობა არის შთაგონების წყარო ყველასთვის, ვისაც მასთან სულ მცირედი შეხება მაინც ჰქონია.
გიგას ჰაბი - ახალი ეპოქის პროექტი
გიგას ოცნება იყო აეშენებინა სრულად ადაპტირებული სივრცე, სადაც ადამიანები, რომლებსაც ეს ძალიან სჭირდებოდათ, შეძლებდნენ სრულფასოვან ცხოვრებას და პროფესიულ განვითარებასაც. ასე გაჩნდა იდეა „გიგას ჰაბი“, პროექტი, რომელიც საქართველოსთვის რევოლუციური იდეა იყო. „გიგას ჰაბი“ აერთიანებს ყველა საჭირო სერვისს, დაწყებული ტრანსპორტირებით, დამთავრებული პროფესიული გადამზადებით. ეს იქნება ადგილი, სადაც ადამიანები მიიღებენ ინფორმაციას თავიანთ უფლებებზე, განავითარებენ პროფესიულ უნარებს და მიიღებენ საზოგადოებრივ მხარდაჭერას.
მიუხედავად პანდემიის, ფინანსური სირთულეებისა და სხვა გამოწვევებისა, გიგა არ დანებდა. მისი მონდომება გადამდები გახდა და მას 3200-ზე მეტი ადამიანი და 10-ზე მეტი კომპანია გვერდით დაუდგა, რაც ნათლად აჩვენებს, რამდენად დიდი გავლენა აქვს მის იდეებს. დღეს „გიგას ჰაბი“ მშენებლობის პროცესშია და მალე რეალობად იქცევა.
გიგა - შთაგონება ყველასთვის
გიგა დაამტკიცა, რომ ნამდვილი სიძლიერე გულისხმობს არამხოლოდ გამოწვევების წინაშე მყარად დგომას, არამედ საკუთარი თავის მუდმივ გაუმჯობესებასა და წინსვლას. გიგა იყო ის ადამიანი, რომელიც გვახსენებს, რომ ცხოვრების გზაზე არ არსებობს დაუძლეველი დაბრკოლებები. მისი 35-წლიანი ცხოვრება სავსეა სიმამაცის, შეუპოვრობისა და ცვლილებებისთვის ბრძოლის მაგალითებით. საკუთარი ხანმოკლე ცხოვრებით გვასწავლა, რომ თუ გული და გონება სწორად გვაქვს მიმართული, ნებისმიერი დაბრკოლება გადალახვადია. ის არის ცოცხალი მაგალითი იმისა, რომ ერთმა ადამიანმაც კი შეიძლება შეცვალოს სამყარო უკეთესობისკენ.
გიგას ისტორია ყველასთვის დარჩება მოტივაციად – რომ ჩვენ ყველას შეგვიძლია შევცვალოთ ჩვენი რეალობა, რომ ოცნებები ასრულებადია.
ვიდეო არქივიდან
